2025-ci ilin bahar semestri etibarilə İstanbul Texniki Universitetində (İTÜ) 253 bakalavr, 22 magistr və 3 doktorantura olmaqla ümumilikdə 278 nəfər Azərbaycan vətəndaşı təhsil alır. Universitet haqqında mütləq öncədən bu tələbələrlə əlaqə qurub bilgi almanızda fayda var. Unutmayın ki, İTÜ-də təhsil almaq çətindir. Odur ki, oturub çalışa bilmək, vaxtını düzgün bölmək kimi alışqanlıqlarınızın olması çox önəmlidir.

Dərnəyimizin universitetə rəsmi məktubuna cavab olaraq, Uluslararası Öğrenci Ofisi abituriyentlərə aşağıdakı mövzularda diqqətli olmağı tövsiyə edir:

1. Universitet heç bir 3-cü tərəflə işləmir. Yalnız bu yöndə səhv məlumatlar verərək bəzi firmalar maddi çıxar xatirinə abituriyentləri səhv yönləndirir. Bu da xərc və zaman itkisinə səbəb olmaqdadır. Odur ki, universitetin rəsmi kanallarına müraciət edilməlidir.

2. Tələbələr gəldiklərində xüsusilə "Dənklik Bəlgəsi" mövzusunda problemlər yaşayır. Dənkliklər Azərbaycanda Türkiyə Təhsil Müşavirliyi tərəfindən verilir.

3. Tələbələr universitetə qəbul olduqdan sonra sığorta etdirmək məcburiyyətindədirlər. Bu sığorta çərçivəsində SGK (Sosial Güvənlik Qurumu) vasitəsilə də sığorta etdirmək seçimi vardır. Bu üsul bəzi funksiyasız sığortalardan uzaq qalmağa və tələbənin mağdur olmamasına kömək edəcəkdir.

4. Tələbələr arasında ən çox rast gəlinən problemlərdən biri də apostilli sənədlərin təqdim edilməməsidir.

5. Oturma izni də tələbələrin ən çox çətinlik çəkdiyi problemlər sırasındadır. Burada da müxtəlif şirkətlərin yanlış yönləndirmələrindən doğan problemlər müşahidə olunmaqdadır. Halbuki, tələbələr heç bir ödəniş etmədən ofisin rəsmi internet səhifəsinə daxil olaraq oturma izni müraciətlərini həyata keçirə bilərlər.