Azmoder
18 Dekabr 2025
18.12.2025 tarixində AZMODER nümayəndələri Azərbaycan Respublikasının Ankaradakı Səfirliyində görüş keçirərək Türkiyədə təhsil alan azərbaycanlı tələbələrin real təcrübələrinə əsaslanan məsələləri, araşdırma nəticələrini və gələcək əməkdaşlıq istiqamətlərini müzakirə ediblər.
18 dekabr 2025-ci il tarixində Azərbaycanlı Tələbələr və Məzunlar Dərnəyi — AZMODER nümayəndələri Azərbaycan Respublikasının Ankaradakı Səfirliyini ziyarət ediblər.
Görüş zamanı Türkiyədə, xüsusilə Ankara şəhərində təhsil alan azərbaycanlı tələbələrin gündəlik həyatda, universitet mühitində və rəsmi prosedurlarda qarşılaşdıqları məsələlər ətrafında fikir mübadiləsi aparılıb. Müzakirələr real tələbə təcrübələri, müraciətlər və dərnək tərəfindən aparılan müşahidələr əsasında formalaşdırılıb.
AZMODER tərəfindən tələbələrin ehtiyacları, mövcud problemlər, məlumatlandırma boşluqları və tələbə təşkilatlanmasının gücləndirilməsi ilə bağlı bəzi araşdırma nəticələri və sahədən toplanmış müşahidələr diplomatik nümayəndələrimizə təqdim edilib.
Görüşün əsas məqsədi Ankarada azərbaycanlı tələbələr üçün daha davamlı, rahat, təhlükəsiz və faydalı bir tələbə mühitinin formalaşmasına töhfə vermək olub. Bu istiqamətdə tələbələrin universitetlərlə, aidiyyəti qurumlarla və diplomatik nümayəndəliklərlə daha sağlam əlaqə qurmasının əhəmiyyəti vurğulanıb.
Diplomatik nümayəndələrimiz tərəfindən də Türkiyəd ə təhsil alan azərbaycanlı tələbələrin daha yaxşı təşkilatlanması, düzgün məlumatlandırılması və faydalı təşəbbüslərin dəstəklənməsi istiqamətində müsbət yanaşma və dəstək ifadə olunub. Görüş zamanı gələcəkdə əlaqələrin davam etdirilməsi, mövcud işlərin daha sistemli şəkildə irəliləməsi və tələbələrlə bağlı atıla biləcək addımlar barədə ortaq anlayış formalaşıb.
AZMODER olaraq yaxın dövrdə Ankaradakı universitetlərdə aktiv olan tələbələrlə daha sıx ünsiyyətdə olmağı, tələbə təşəbbüslərinin əlaqələndirilməsinə dəstək verməyi və mövcud fəaliyyətlərin daha rahat irəliləməsi üçün koordinasiya tərəfində fəal rol oynamağı planlaşdırırıq.
Səmimi qəbula, göstərilən diqqətə və tələbələrimizlə bağlı məsələlərə verilən önəmə görə Azərbaycan Respublikasının Ankaradakı Səfirliyinə və görüşdə iştirak edən diplomatik nümayəndələrimizə təşəkkürümüzü bildiririk.